星期日：
一連三個FUNCTION，首先就梗係有我嗰個《動漫電玩遊樂園》啦，SETTLE DOWN晒之後就嗱嗱林趕過去沙田帝都酒店去「百分百感覺劉雲傑分享會」，今次除咗有劉雲之外，重有扈佳榮、可嵐同埋李蘊。今次唔係我做MC，我純出席啫。
之後就又趕頭趕命去荷李活中心個由韓國觀光公社搞嘅《韓國冬日狂歡節》，今次特別嘉賓係為HOTCHA，重有唻自韓國嘅亂打CREW同埋靚女滑雪教練，最抵死就係有第一屆韓國IMAGE GRIL選舉。如果想睇返呢個SHOW嘅精華就記得上我Youtube同Facebook睇喇。

 

   
星期一~四：
呢幾日只係做咗幾樣嘢，就係食飯瞓覺去廁所剪片同埋去西九做《Dragon Music Alive》，今個星期嘉賓有赤子嘅呀YO同呀博、A DAY同埋KellyJackie4個單位！而之後嘅《Dragon Music Alive》就係?11月嘅23-26號，表演嘉賓就有J.O.Y.、85UP2、PINK同埋Girliciouss Asia，今次我重失驚無神咁會走上台同佢哋JAM吓歌！到時記得下晝5點半準時西九龍中心一樓大堂見喇！
   
星期五：
等?大半年，終於等到我偶像之一Roland Emmerich?大作2012上喇！作為FANZ嘅我點會唔第一時間睇吖，我去咗油尖旺好多間戲院買飛都FULL晒，最後就卒之晌尖沙咀華懋搵到兩張黐埋牆嘅位，難得有少少時間，就梗係咩位只要唔係背住銀幕就咩位都肯睇?。雖然Roland嘅戲來來去去都係嗰幾種FORMULA，但每次淨睇特技都睇到我眼坦坦！唔覺唔覺又兩個幾鐘，唔知我幾時先寫到呢啲咁嘅劇本而又有人肯投資俾我拍呢？
 
星期六、日：
又到一星期一次晌西九搞嘅《動漫電玩遊樂園》FUNCTION嘅日子喇！今次一氣呵成搞足兩個SHOW！就係《動漫電玩遊樂園》嘅KICK OFF SHOW同埋同ANIMAX合辦?《ANIMAX角色扮演大賽》，而嘉賓方面我哋就搵咗十個專業COSPLAYER、唻自日本嘅MODEL歌手SUGAHO同埋09女新人羽翹AVA、重有YO-HK嘅大當家CORIA，再加上COSPLAY達人HENRY出席，兼做埋評判添！又係嗰句啦，想聽返睇返當日SHOW就記得CLICK入UONLIVE.COM同埋YO-HK.COM聽返睇返啦！

 
 
星期一：
由我Zoho D.I.Y. Muzik Factory、中青基業、陽光網絡及E-Sport合辦，Yo-HK.com同埋Uonlive.com協辦嘅第一屆《Miss IEF 2009》選舉，將喺11月28日晌西九龍中心《動漫電玩遊樂園》入面進行決賽！十位入選Miss IEF候選人已經選晒出唻，大家可以CLICK入http://missief.esports.hk網上投票同先睹為快啦！
 
星期二：
啱啱呢頭先至話今年十月先係近幾十年最熱嘅十月，一個禮拜唔夠嗰頭十一月就係近22年最凍嘅十一月，係咪黐線架！睇返唔單止香港，成個中國，甚至全世界嘅氣候都反晒常！華北雪災、華南旱災、華東水災，英國又水災、南極又有冰山甩咗落唻飄向紐西蘭、又周圍都地震，真係唔知幾時香港會陸沉呢，其實我覺得而家先講環保已經無用，因前人積落個鑊真係好大，即管睇吓12月個全球氣候會議啲大國傾成點啦！
 
星期三：
一定要支持！我兩位老友最新派台歌！長洲村姑水滴AVA羽翹嘅「吸血新世紀」同埋許樂洪傑扈佳榮嘅「我對我」，記住捧場聽晒呀！
 
星期四：
今日應呀劉雲傑邀請，我同KJ KellyJackie去咗佢老友新開嘅紅酒窖試酒，呢隻酒係西班牙牌子，好唔好飲就真係唔知，因為係人都知我係滴酒不沾，點都唔明點解劉雲會搵我去試酒嘅，哈哈！但係唔講試酒，我就對佢嗰隻鬼佬金華火腿勁有興趣！嗰隻西班牙煙燻豬脾，聽佢哋講值成幾千蚊架！我一個人幾乎食咗佢三分一，好味到呢！重有佢嗰隻高檔鵝肝醬，完全唔覺得羶，重有啲啲甜添，愛唻搽麵包一流！雖然我無飲酒，但就聽佢哋講咗好多紅酒同白酒嘅知識，都學到唔少嘢架！
  
星期五：
香港人喺冬天十居其九都係打甂爐當食飯架啦，我今日忽發奇想，3條友喺屋企打甂爐，最正嘅就係我契女喺佢男友檔家族海鮮舖揀咗啲超撚手又新鮮又好味嘅海鮮拼盤唻，有魚啦、蝦啦、蟹啦、迷你象拔蚌啦、聖子啦、花甲啦咁，我最鍾意就係海鮮火鍋，啲肥牛同啲丸呀咁真係行埋一二角！好難得居然有一餐甂爐會甂到清晒，最後連湯都唔放過！飲埋！用海鮮打甂爐直頭係人生呀！
    
星期六：
又一個星期，今次西九龍中心嘅《動漫電玩遊樂園》係《Cosplay動漫歌曲歌唱大賽》，身兼嘉賓兼評判嘅就係日本樂隊Girliciouss Asia同埋COSPLAY達人HENRY！問過Girliciouss Asia佢哋，啲參賽者嘅日文正唔正宗，佢哋都話正到不得了，認真估唔到！
夜晚去咗睇鄧紙皮GEM嘅九展嘅第一次個人演唱會，「18 LIVE」，無嘢講，歌精舞勁唱得陣得，點夠佢頂呀！送俾大家兩張保證全港獨家?GEM演唱會嘅相啦！

星期日：今晚去咗捧我老友長洲村姑水滴羽翹喺Backstage舉行佢個第一嘢個人mini live！全場企位full晒咁滯實在太多人捧場，而我又有個習慣係唔會企嘅，年紀大骨頭疏鬆無計啦。搞到我成晚都見唔到Ava個樣，只係聽到佢唱歌，直頭好似喺屋企聽緊live CD咁，哈！不過話時話，Ava寅係唱得好好，雖然佢嗰日喉嚨唔舒服，但佢啲fanz仍然撐到佢行一行！好嘢！羽翹！

星期一：真係唔知咩事，一張成千蚊嘅大班椅居然俾我坐到分開兩節！唔知係我太重定張櫈日久失修啦！今日剪剪吓片諗住向後挨一嘢，但就啪一聲，成張本來有背嘅大班椅，突然變咗做一張床！無錯，係一張床！因為個椅背已經同個坐位拉直成一直線！差啲跌鬼死我！咁我盲無可奈何之下唯有揼咗呢張曾經陪我通過唔少頂嘅戰友！最唔好意思嘅就係呢位戰友係我老友Don送俾我嘅新屋禮物！Oh~~Im so sori abt datz！

星期二：今日係今個星期唯一一day有由我uonlive Hip Hop Zoho節目同西九龍中心cross over嘅Dragon Music Alive，今日嘅嘉賓就係J.O.Y.，有聽過我節目都對佢哋有認識架喇，想聽返當日轉播就記得click入uonlive.com揀返Hip Hop Zoho節目聽返喇喂！

星期三：前晚去咗睇《大鑊密探》首映，今朝一早約埋KellyJackie錄下一集《知戲館》節目，我周圍同人講睇《大鑊密探》，啲人都係問我係咪睇港產片，哈！因個名大似啲咩大內密探喇！不過話時話，我未睇套戲之前都以為套戲係講FBI查案，睇落先知其實係一套用腦睇嘅戲！我喺度俾個tips大家，睇呢套戲真係唔可以分神，因為成套戲唔停咁有對白同有嘢講，一定要記住劇情先可以有所領悟！記住喇！

星期四：識我嘅人都知我部電腦一年壞幾次，最抵死嘅就係我每次都唔係就咁整少少，係每次我都幾乎成部換過咁滯！但盲唔知點解換極買極都有問題！我個frenz整咗九萬幾次，佢都唔明點解我部電腦會整極都有問題！查實我部電腦加加埋埋差唔多砌咗成萬蚊，但都唔知點解成日有問題！究竟係咪我屋企風水唔好，定我用得唔好呢？有無人幫到我呀！

星期五：今日去咗Sony喺銅鑼灣LCX個playground試玩一個非常新嘅PS3 game，個game叫「Eye Pet」，真係勢估唔到而家啲game可以進步到咁嘅地步！唔知大家重記唔記得上世紀曾經有樣嘢叫做「他媽哥池」呢？呢個就係「他媽哥池」嘅千禧版，佢除咗唔可以帶住周圍去之外，簡直同一隻真寵物無咩分別！妳可以餵佢同佢玩幫佢沖涼呀咁之外，重可以幫佢搞搞毛色髮形！但我問咗Sony方面，都唔知呢隻嘢實情係咩品種，有馬騮嘅外形，但係有狗嘅動作，不過唔好理咁多，四百幾蚊鐘意幾時玩就幾時玩，重唔驚搵地方養佢，又唔會整污糟地方，邊度搵呀！買啦！

星期六：由今日開始，一連8個星期嘅《動漫電玩遊樂園》正式開始喇！係由我Zoho D.I.Y. Muzik Factory同埋西九龍中心合作主辦，Uonlive.com同Yo-hk.com全力支持！咁呢個《動漫電玩遊樂園》有啲咩搞作呢？就係每星期六日都會有show有表演，同埋一啲cosplay比賽之餘….重有好多cosplay、同人誌同一啲大品牌佛如，Animax、Bandai Namco同埋文化傳信擺booth，最抵死嘅就係你哋可以利用我哋免費提供嘅cosplay衫玩cosplay！咁好玩得意，點可以唔捧場呀！俾埋個時間表你哋睇啦！

日期	時間	活動名稱	表演單位/嘉賓	MC
25-10-2009	1500-1600	《文化傳信商業漫畫教室》		Zoho
25-10-2009	1600-1700	《百分百感覺廣播劇我最期待的結局》發佈會		Zoho
31-10-2009	1600-1700	《夾公仔達人皇者挑戰賽》		文恩澄
07-11-2009	1600-1800	《Cosplay舞蹈比賽》	黃榕	ThatsWhy、典子
14-11-2009	1600-1800	《動漫電玩遊樂園》啟動儀式	10名香港Cosplay會的Cosplayer	Sam
14-11-2009	1600-1800	《Animax角色扮演大賽》	Kougi Son(G)	Zoho、Rachel
21-11-2009	1600-1800	《Cosplay動畫主題歌曲歌唱比賽》	Girliciouss Asia	ThatsWhy、典子
28-11-2009	1600-1800	《IEF小姐選舉》(暫名)		Zoho
05-12-2009	1600-1800	《Cosplay舞台劇比賽》		ThatsWhy、典子

星期日：今日全日都拍school.net嘅教育電視，個教育電視唔係我哋細個睇開嗰啲ETV，係專俾一啲家長睇嘅幼兒教學。教啲家長點樣教佢哋嘅細蚊仔，每次都有兩三個小演員，都係3-9歲左右，不過今次有一個係最細嘅，啱啱六個月大，以前拍電視劇嗰陣曾經拍過一個幾個月大嘅BB，嗰個BB喊到吖！兩個鐘都唔收聲，我哋上至導演，下至場記、機器組都搞佢唔掂！唯一就係呀媽抱先唔喊，但唔得架嘛，最後搞到要換BB先拍到。但今次個BB無喊不特止，重好好表情同曉笑添，就係咁，我哋就唔駛遲收工，話咁快就拍晒喇！

星期一：又印新卡片，呢張卡片經我屈指一算，由我第一份工開始計起，已經係第二十款卡片，真係講都無人信！今次呢張特登印埋uonlive同埋我公司facebook group落去，等啲客知我多啲嘛！一路都無同人講過，我呢張卡片個grafitti係我自家出品架！重有我公司logo都係，重要係用人手畫完再scan落photoshop執色，靚唔靚就真係見仁見智喇，但實情都幾old school吓架！

星期二：今晚去咗睇華納嘅《極度冰慌》首影，套戲講咩就喺呢度唔講住，要講嘅就係呢套戲令我知道原來喺南極打風嗰陣行出室外，好似搭棚師傅咁用條安全帶箍住唻行，如果唔係就隨時畀啲over 100公里嘅烈風吹走，都咪話唔危險！都係嗰句，想知套戲拍成點，記得今個星期六留意uonlive.com我同KellyJackie主持嘅《知戲館》喇！

星期三：呢頭先話啱啱感冒好返，嗰頭又個肚唔舒服，痾咗兩日！痴線咩！年頭睇流年已經話我今年好病，但真係勢估唔到病得咁密，由年初五開始又痾又嘔，之後又試過成個星期失聲，之後又發燒又感冒又咳，呢度整損手，嗰度整損腳，真係應有盡有！老實講，我以前不嬲叫鐵人，一年唔會病多過兩次，重兩次都係不藥而癒嗰隻添，但而家…人老就係咁架喇！死啦，我會唔會就死架？送幅八月十五嘅八星伴月大家睇睇啦！

星期四：近排突然鐘意咗食呢隻朱古力，原因有三個，一係我係朱古力迷，幾乎日日都要食過朱古力先安心嘅，二係我對薄荷亦有一種無得形容嘅喜愛，三呢就係呢個牌子嘅朱古力我由細食到大，再加上呢排勁睇佢嗰個戚眉戚眼TVC，咁咪一星期狂食兩排！唔知係咪因為咁食到個肚唔多妥，到今日重未好返，三日喇…

星期五：今日去咗老友Lydia Ding屋企開嘅舖頭grand opening，佢呢間倗頭個名叫《優質食品專門店》，我就咁睇個名，除咗覺得佢係賣同食有關嘅嘢之外，基本上我完全估唔到佢係賣咩嘅，今日咁啱去開嗰頭做嘢，又未夠鐘返電台，就好稀罕咁蒲一蒲頭。其實識我嘅人都知我向來好少出席呢啲喜慶場合，我個frenz見到我出現，佢都忍唔住講：「稀客喎！估唔到你真係會唻！」哈，邊有咁易估到我吖！講返間舖，間舖賣啲嘢九成係我最鐘意食嘅嘢！有唔同產地嘅三文魚啦、火腿啦、香腸呀咁！正！佢話佢哋係直接批發，一定平通街！最衰我唔食生蠔，如果唔係都幾hapi，因為佢成個櫃都係賣生蠔，各位行開大埔東昌街真係唔買都入去昅昅喇！

星期六：經過由上星期六到今星期六七日內我踢咗四日波之後，我發覺我右腳膝頭嘅舊患再痛返之餘，左腳腳踭又新添咗新傷！本來聽晚同後晚都有波踢，但為咗可以繼續延長足球生命，我唯有忍吓唔踢啦！不過話時話，我踢波踢得最密係舊年六月，三十日裡面總共踢咗16場波！離晒譜！重有早幾年又試過連續兩年一星期踢四場波，重密過職業球員！就係咁，我兩隻腳啲傷患真係多到不得了，但為咗hapi同keep fit無計啦！